Хууль санаачлагч нар
 Монгол Улсын Засгийн газар
Боловсруулж буй
Өргөн баригдсан
Хэлэлцэх эсэх
Ажлын хэсэг
Анхны хэлэлцүүлэг
Эцсийн хэлэлцүүлэг
Батлах.

Монгол Улсын хууль

2025 ОНЫ 5-Р САРЫН 15 ӨДӨР
УЛААНБААТАР

СТАНДАРТЧИЛАЛ, ТЕХНИКИЙН ЗОХИЦУУЛАЛТ, ТОХИРЛЫН ҮНЭЛГЭЭНИЙ ИТГЭМЖЛЭЛИЙН ТУХАЙ

НЭГДҮГЭЭР БҮЛЭГ
НИЙТЛЭГ ҮНДЭСЛЭЛ
1 дүгээр зүйл. Хуулийн зорилт
1.1. Энэ хуулийн зорилт нь стандартчилал, техникийн зохицуулалт, тохирлын үнэлгээ, тохирлын үнэлгээний итгэмжлэлийн эрх зүйн үндсийг тогтоож, бүтээгдэхүүн, үйлдвэрлэл, үйлчилгээний чанар, аюулгүй байдлыг хангахтай холбогдсон харилцааг зохицуулахад оршино.
2 дугаар зүйл. Стандартчилал, техникийн зохицуулалт, тохирлын үнэлгээний итгэмжлэлийн хууль тогтоомж
2.1. Стандартчилал, техникийн зохицуулалт, тохирлын үнэлгээ, тохирлын үнэлгээний итгэмжлэлийн хууль тогтоомж нь Монгол Улсын Үндсэн хууль, энэ хууль болон эдгээр хуультай нийцүүлэн гаргасан хууль тогтоомжоос бүрдэнэ.
2.2. Монгол Улсын олон улсын гэрээнд энэ хуульд зааснаас өөрөөр заасан бол олон улсын гэрээний заалтыг дагаж мөрдөнө.
3 дугаар зүйл. Стандартчилал, техникийн зохицуулалт, тохирлын үнэлгээ, тохирлын үнэлгээний итгэмжлэлийн зарчим
3.1. Стандартчилал, техникийн зохицуулалт, тохирлын үнэлгээний итгэмжлэлийн үйл ажиллагаанд дараах зарчмыг баримтална:
3.1.1. хүний амь нас, эрүүл мэнд, нийгмийн болон хүрээлэн байгаа орчны аюулгүй байдлыг хангасан байх;
3.1.2. бие даасан, хараат бус байх;
3.1.3. сонирхогч талуудын оролцоог тэгш хангасан байх;
3.1.4. барим т нотолгоо, шинжлэх ухаан, дэвшилтэт технологи, инновацид суурилсан байх;
3.1.5. үйлдвэрлэл, худалдаанд хуульд заасан үндэслэл, журмаас гадуур аливаа хэлбэрээр саад учруулахгүй байх;
4 дүгээр зүйл. Хуулийн нэр томьёоны тодорхойлолт
4.1. Энэ хуульд хэрэглэсэн дараах нэр томьёог доор дурдсан утгаар ойлгоно:
4.1.1. "стандартчилал" гэж бүтээгдэхүүн, үйлчилгээний харилцан орлуулалт, мэдээлэл, техник, хэмжилт, сорилтын нэгдмэл, нийцтэй, аюулгүй байдлыг хангах зорилгоор нийтээр, дахин давтан хэрэглэх журам тогтоох үйл ажиллагааг;
4.1.2. "стандарт" гэж тодорхой хүрээнд хэм хэмжээ бий болгоход чиглэсэн ерөнхий зарчим, үзүүлэлтийг сонирхогч талууд зөвшилцөн боловсруулж, баталсан, дагаж мөрдөх баримт бичгийг;
4.1.3. "техникийн зохицуулалт" гэж бүтээгдэхүүний тодорхойлолт, боловсруулалт, үйлдвэрлэлийн арга, стандарт, техникийн үзүүлэлт болон шаардлагыг эш татаж, эсхүл тэдгээрийн агуулгыг тусгаж эрх бүхий байгууллагаас баталсан заавал дагаж мөрдөх баримт бичгийг;
4.1.4. "тохирлын үнэлгээ" гэж стандарт, техникийн зохицуулалтын шаардлагыг хангаж байгаа эсэхийг тогтоох үйл ажиллагааг;
4.1.5. "тохирлын үнэлгээний байгууллага" гэж энэ хуулийн 4.1.4-т заасан үйл ажиллагааг эрхлэх байгууллагыг;
4.1.6. "баталгаажуулалт" гэж бүтээгдэхүүн, тогтолцоо нь тогтоосон шаардлагад нийцэж байгааг эрх бүхий хөндлөнгийн байгууллагын нотлох ажиллагааг;
4.1.7. "тохирлын баталгаа" гэж бүтээгдэхүүн нь тогтоосон шаардлагад нийцэж байгааг нотлох тохирлын гэрчилгээ, нийлүүлэгчийн мэдэгдлийг;
4.1.8. "тохирлын гэрчилгээ" гэж бүтээгдэхүүн нь стандарт, техникийн зохицуулалтын шаардлагад нийцэж байгааг тодорхойлсон баримт бичгийг;
4.1.9. "нийлүүлэгчийн мэдэгдэл" гэж бүтээгдэхүүн нь тогтоосон шаардлагад нийцэж байгаа талаар үйлдвэрлэгч, эсхүл нийлүүлэгчээс бичгээр гаргасан нотолгоог;
4.1.10. "тохирлын тэмдэг" гэж бүтээгдэхүүн нь стандартын шаардлагыг хангаж байгааг тодорхойлсон тэмдэглэгээг;
4.1.11. "аюулгүйн тэмдэг" гэж бүтээгдэхүүн нь техникийн зохицуулалтын шаардлагыг хангаж байгааг тодорхойлсон тэмдэглэгээг;
4.1.12. "баталгаажуулалтын схем” гэж тохирлын үнэлгээнд хамрагдах зүйлийг тодорхойлж, үнэлэх аргачлалыг;
4.1.13. "тохирлын үнэлгээний итгэмжлэл" гэж эрх бүхий байгууллагаас тохирлын үнэлгээний үйл ажиллагааг гүйцэтгэх мэргэжлийн чадавхитайг тогтоох ажиллагааг;
4.1.14. “сорилт” гэж стандарт, арга аргачлалын дагуу бүтээгдэхүүний үзүүлэлтийг тодорхойлох үйл ажиллагааг;
4.1.15. "бүтээгдэхүүн" гэж үйлдвэрлэл, үйлчилгээний үйл явцад бий болсон үр дүнг;
4.2. Энэ хуулийн 4.1-д зааснаас бусад нэр томьёог Монгол Улсын хууль, олон улсын стандартчиллын байгууллагаас баталсан стандарт, удирдамжид заасны дагуу ойлгож хэрэглэнэ.
ХОЁРДУГААР БҮЛЭГ
СТАНДАРТЧИЛАЛ, ТЕХНИКИЙН ЗОХИЦУУЛАЛТ
5 дугаар зүйл. Техникийн зохицуулалт
5.1. Хүн, малын эрүүл мэнд, хүрээлэн байгаа орчин, бүтээгдэхүүн, үйлдвэрлэлийн аюулгүй байдлыг хангах, нийтийн ашиг сонирхлыг хамгаалах зорилгоор техникийн зохицуулалтыг нийтээр заавал дагаж мөрдөнө.
5.2. Техникийн зохицуулалтыг төрийн захиргааны төв байгууллага боловсруулж, энэ хуулийн 5.3-т заасан дүгнэлтийг үндэслэн Засгийн газар батална.
5.3. Техникийн зохицуулалт боловсруулах аргачлалыг стандартаар тогтоох бөгөөд аргачлалын дагуу боловсруулсан эсэхийг стандартчилал, тохирлын үнэлгээний төв байгууллага хянаж, дүгнэлт гаргана.
5.4. Техникийн зохицуулалтын хэрэгжилтийг улсын хэмжээнд Засгийн газар болон Төрийн хяналт шалгалтын тухай хуульд заасан эрх бүхий байгууллага хангуулна.
5.5. Монгол Улсаас гадаад худалдаанд хэрэглэх техникийн зохицуулалтыг батлагдахаас 60-аас доошгүй хоногийн өмнө стандартчилал, тохирлын үнэлгээний төв байгууллага нь Дэлхийн худалдааны байгууллагын гишүүн орнуудад мэдээлнэ.
5.6. Дэлхийн худалдааны байгууллагын гишүүн орнуудаас санал болгож байгаа гадаад худалдаанд хэрэглэх техникийн зохицуулалтыг хүлээн зөвшөөрөх эсэх асуудлыг гадаад харилцааны асуудал эрхэлсэн төрийн захиргааны төв байгууллагын саналыг үндэслэн Засгийн газар шийдвэрлэнэ.
5.7. Зөвшөөрөл эзэмшигч энэ хуульд заасан техникийн зохицуулалтыг зөрчсөн тохиолдолд Зөвшөөрлийн тухай хуульд заасны дагуу зөвшөөрлийг түдгэлзүүлэх, хүчингүй болгох үндэслэл болно.
6 дугаар зүйл. Стандартчиллын зорилго, баримт бичиг
6.1. Стандартчиллын зорилго нь бүтээгдэхүүний хэрэглээний нийцтэй байдал болон сорилт, хэмжилтийн нэгдмэл байдлыг хангах замаар нөөцийг зүй зохистой ашиглах, бүтээгдэхүүний өрсөлдөх чадварыг дээшлүүлэх, худалдааг нэмэгдүүлэхэд дэмжлэг үзүүлэхэд оршино.
6.2. Стандартчиллын баримт бичигт дараах баримт бичиг хамаарна:
6.2.1. Монгол Улсын /цаашид "үндэсний" гэх/ стандарт;
6.2.2. хотын стандарт;
6.2.3. байгууллагын стандарт;
6.2.4. олон улсын болон бүс нутгийн стандарт, удирдамж, зөвлөмж, гадаад улсын стандарт.
6.3. Стандартчиллын баримт бичиг зохиогчийн эрхэд хамаарахгүй.
7 дугаар зүйл. Үндэсний стандарт
7.1. Үндэсний стандартыг стандартчилал, тохирлын үнэлгээний төв байгууллага батална.
7.2. Үндэсний стандарт нь олон улс, бүс нутгийн стандартын үзүүлэлт, шаардлагад нийцсэн байна.
7.3. Үндэсний стандартын төслийг сонирхогч талууд зөвшилцлийн үндсэн дээр санаачлан боловсруулна.
7.4. Үндэсний стандарт нь товчилсон тэмдэглэгээ, улсын бүртгэлийн дугаартай байх бөгөөд түүнийг баталсан шийдвэрт өөрөөр заагаагүй бол стандартчиллын баримт бичгийн мэдээллийн санд бүртгэсэн өдрөөс эхлэн хүчин төгөлдөр болно.
7.5. Бусад хуульд стандартыг баталж, мөрдүүлэхээр заасан бол бүртгүүлж, хэрэгжүүлэхтэй холбогдсон харилцааг энэ хуулиар зохицуулна.
8 дугаар зүйл. Хотын стандарт
8.1. Хотын удирдлагаас хуульд заасны дагуу хотын стандартыг батлан хэрэглэнэ.
8.2. Хотын стандарт нь үндэсний стандарт, техникийн зохицуулалтын үзүүлэлт, шаардлагад нийцсэн байна.
9 дүгээр зүйл. Байгууллагын стандарт
9.1. Хуулийн этгээд нь байгууллагын стандартыг боловсруулан үйл ажиллагаандаа хэрэглэж болно.
9.2. Байгууллагын стандарт нь үндэсний болон олон улс, бүс нутаг, гадаад улсын стандарт, техникийн зохицуулалтын шаардлагад нийцсэн байна
9.3. Байгууллагын стандартыг стандартчилал, тохирлын үнэлгээний төв байгууллага, түүний харьяа аймаг, нийслэл дэх байгууллагад бүртгүүлнэ.
10 дугаар зүйл. Олон улсын болон бүс нутгийн стандарт, удирдамж, зөвлөмж, гадаад улсын стандарт
10.1. Иргэн, хуулийн этгээд нь олон улсын болон бүс нутгийн стандарт, удирдамж, зөвлөмж, гадаад улсын стандартыг стандартчилал, тохирлын үнэлгээний төв байгууллагад бүртгүүлсний үндсэн дээр хэрэглэж болно.
10.2. Олон улсын болон бүс нутгийн стандарт, удирдамж, зөвлөмж, гадаад улсын стандартыг бүртгүүлэн хэрэглэх хугацаа 18 сар хүртэл байна.
10.3. Иргэн, хуулийн этгээд нь энэ хуулийн 10.1-д заасны дагуу бүртгүүлэн хэрэглэж байгаа Стандартчиллын баримт бичгийг энэ хуулийн 10.2-т заасан хугацаанд үндэсний стандартаар батлуулна.
11 дүгээр зүйл. Стандартчиллын техникийн хороо
11.1. Стандартчилал, тохирлын үнэлгээний төв байгууллагын дэргэд салбарын харьяаллаар үндэсний болон олон улс, бүс нутгийн, хотын стандартын төслийг хэлэлцэх, санал, дүгнэлт гаргах үүрэг бүхий орон тооны бус Стандартчиллын техникийн хороо /цаашид "Техникийн хороо" гэх/ ажиллана.
11.2. Шаардлагатай гэж үзвэл тодорхой чиглэлээр Техникийн дэд хороог байгуулан ажиллуулж болно.
11.3. Техникийн хороо, дэд хороо нь төрийн байгууллага, тухайн салбарын мэргэжлийн холбоод, хуулийн этгээд, шинжлэх ухааны байгууллагын төлөөлөл болон сонирхогч бусад талуудын төлөөлөл бүхий 15 хүртэлх гишүүний бүрэлдэхүүнтэй байна.
11.4. Техникийн хороо, дэд хороо нь дараах эрх, үүрэгтэй:
11.4.1. үндэсний болон олон улс, бүс нутгийн стандартын төслийг хэлэлцэх, санал өгөх, дүгнэлт гаргах;
11.4.2. стандартын төсөлд холбогдох байгууллагын санал авах, сонирхогч талуудтай зөвшилцөх;
11.4.3. хүчин төгөлдөр стандартад дүн шинжилгээ, үнэлгээ хийх, шаардлагатай арга хэмжээ авч хэрэгжүүлэх;
11.4.4. стандартын боловсруулалтын түвшин, агуулга зохих шаардлагад нийцсэн эсэхийг хянах.
11.5. Техникийн хороо, дэд хорооны гишүүд нь ашиг сонирхлын зөрчилгүй байна.
12 дугаар зүйл. Стандартыг мөрдөх, хэрэглэх
12.1. Иргэн, хуулийн этгээд стандартыг дагаж мөрдөнө.
12.2. Хууль тогтоомж, техникийн зохицуулалт, олон улсын гэрээнд эш татсан стандарт нь тухайн баримт бичгийн нэгэн адил хүчинтэй байна.
12.3. Үндэсний болон олон улс, бүс нутаг, гадаад улсын стандартыг хувилан олшруулахыг хориглоно.
ГУРАВДУГААР БҮЛЭГ
ТОХИРЛЫН ҮНЭЛГЭЭ
13 дугаар зүйл. Тохирлын үнэлгээний зорилго, хамрах хүрээ
13.1. Бүтээгдэхүүний аюулгүй байдлыг хангах, өрсөлдөх чадварыг нэмэгдүүлэх, хэрэглэгчийн эрх, ашгийг хамгаалах зорилгоор тохирлын үнэлгээнд хамруулна.
13.2. Хүн, малын эрүүл мэнд, хүрээлэн байгаа орчин, нийтийн ашиг сонирхолд хохирол учруулж болзошгүй бүтээгдэхүүнийг тохирлын үнэлгээнд заавал хамруулна.
13.3. Тохирлын үнэлгээнд заавал хамруулах бүтээгдэхүүний жагсаалтыг стандартчилал, тохирлын үнэлгээний төв байгууллагын саналыг үндэслэн Засгийн газар батална.
13.4. Менежментийн тогтолцоо болон тохирлын үнэлгээнд заавал хамруулах бүтээгдэхүүнээс бусад бүтээгдэхүүнийг үйлдвэрлэгч, нийлүүлэгч, хэрэглэгчийн хүсэлтээр тохирлын үнэлгээнд хамруулж болно.
14 дүгээр зүйл. Тохирлын баталгаа
14.1. Тохирлын баталгаа нь тохирлын гэрчилгээ болон нийлүүлэгчийн мэдэгдэл хэлбэртэй байна.
14.2. Монгол Улсаас олон улс, бүс нутгийн байгууллага, худалдааны түнш орнуудтай байгуулсан гэрээ, хэлэлцээрээр тохирсон тохирлын болон түүнтэй адилтгах тэмдэг, гэрчилгээг стандартчилал, тохирлын үнэлгээний төв байгууллага хүлээн зөвшөөрнө.
14.3. Тохирлын гэрчилгээ нь Монгол Улсад болон Монгол Улсаас олон улс, бүс нутгийн байгууллага, худалдааны түнш орнуудтай байгуулсан гэрээ, хэлэлцээрээр тохирсон улс орнуудад хүчин төгөлдөр байна.
14.4. Нийлүүлэгчийн мэдэгдэлд тавигдах шаардлагыг стандартаар тогтооно.
14.5. Нийлүүлэгчийн мэдэгдлийг стандартчилал, тохирлын үнэлгээний төв байгууллагад бүртгүүлнэ.
14.6. Экспортын бүтээгдэхүүнд стандартчилал, тохирлын үнэлгээний байгууллага тохирлын гэрчилгээ олгоно.
14.7. Тохирлын болон аюулгүйн тэмдэг, түүнд тавигдах шаардлагыг стандартаар тогтооно.
14.8. Тохирлын тэмдгийг итгэмжлэгдсэн баталгаажуулалтын байгууллага, аюулгүйн тэмдгийг стандартчилал, тохирлын үнэлгээний төв байгууллага олгоно.
15 дугаар зүйл. Тохирлын үнэлгээний байгууллагын эрх, үүрэг
15.1. Тохирлын үнэлгээний байгууллагад дараах байгууллага хамаарна:
15.1.1. баталгаажуулалтын байгууллага;
15.1.2. лаборатори;
15.1.3. техникийн хяналтын байгууллага.
15.2. Тохирлын үнэлгээний байгууллага нь Монгол Улсын хуулийн этгээд байх бөгөөд холбогдох хууль тогтоомж, стандартын дагуу үйл ажиллагаа явуулна.
15.3. Тохирлын үнэлгээний байгууллага нь итгэмжлэлд хамрагдаж болно.
15.4. Хүн, малын эрүүл мэнд, хүрээлэн байгаа орчин, нийтийн ашиг сонирхолд хохирол учруулж болзошгүй бүтээгдэхүүнд итгэмжлэгдсэн тохирлын үнэлгээний байгууллага тохирлын үнэлгээ хийнэ.
15.5. Гадаад улсын итгэмжлэлийн байгууллагаас итгэмжлэгдсэн болон гадаад улсын тохирлын үнэлгээний байгууллага нь Монгол Улсын нутаг дэвсгэрт тохирлын үнэлгээний үйл ажиллагаа эрхлэх бол энэ хуульд заасан итгэмжлэлийн асуудал эрхэлсэн төрийн байгууллагад бүртгүүлнэ.
15.6. Энэ зүйлийн 15.5-д заасны дагуу бүртгүүлээгүй гадаад улсын тохирлын үнэлгээний байгууллагын үр дүнг хүлээн зөвшөөрөхгүй.
15.7. Тохирлын үнэлгээний байгууллага дараах эрх, үүрэгтэй:
15.7.1. тохирлын үнэлгээний үр дүнг үндэслэн тайлан, дүгнэлт гаргах
15.7.2. тохирлын үнэлгээг итгэмжлэлээр тогтоосон хүрээнд явуулах;
15.7.3. итгэмжлэлийн шалгуурыг тогтвортой хангах;
15.7.4. тохирлын үнэлгээний ажилд холбогдох мэргэжилтнийг татан оролцуулах;
15.7.5. тохирлын үнэлгээний дүн, илэрсэн зөрчлийн талаар холбогдох байгууллагад мэдээлэх.
16 дугаар зүйл. Баталгаажуулалтын байгууллага
16.1. Баталгаажуулалтын байгууллага нь бүтээгдэхүүний, менежментийн тогтолцооны, ажилтны гэсэн төрөлтэй байна.
16.2. Баталгаажуулалтын байгууллага нь тохирлын үнэлгээг схемийн дагуу гүйцэтгэнэ.
16.3. Баталгаажуулалтын шинжээчид тавигдах шаардлагыг стандартаар тогтооно.
16.4. Баталгаажуулалтын үйл ажиллагааг стандартчилал, тохирлын үнэлгээний төв байгууллагаас эрх авсан баталгаажуулалтын шинжээч гүйцэтгэнэ.
16.5. Баталгаажуулалтын байгууллага нь итгэмжлэгдсэн сорилт, туршилтын лаборатори, техникийн хяналтын байгууллагын үр дүнг ашиглана.
16.6. Тохирлын үнэлгээний үр дүнгээр тохирлын гэрчилгээг хүчингүй болгосон тохиолдолд энэ тухай зөвшөөрөл олгосон эрх бүхий байгууллага, албан тушаалтанд бичгээр мэдэгдэнэ.
17 дугаар зүйл. Лаборатори
17.1. Лаборатори нь сорилт туршилтын, шалгалт тохируулгын, эмнэлгийн, техникийн оношилгооны гэсэн төрөлтэй байна.
17.2. Лаборатори нь стандарт, арга аргачлалын дагуу үйл ажиллагааг явуулж, үр дүнг бие даасан, хараат бусаар гаргана.
17.3. Лаборатори нь стандартын шаардлагыг хангахуйц нөөц, чадавхтай байна.
18 дугаар зүйл. Техникийн хяналтын байгууллага
18.1. Техникийн хяналт нь үйлдвэрлэгчийн, импортлогчийн, хөндлөнгийн гэсэн төрөлтэй байна.
18.2. Техникийн хяналтын байгууллага нь бүтээгдэхүүн, түүний зохион бүтээлт, үйлдвэрлэл, ажил үйлчилгээ, ажлын байрны орчин нөхцөл, хэвийн ажиллагаа, аюулгүй байдлын үзүүлэлт нь стандартаар тогтоосон шаардлагад нийцэж байгаа эсэхэд дүгнэлт гаргана.
ДӨРӨВДҮГЭЭР БҮЛЭГ
ТОХИРЛЫН ҮНЭЛГЭЭНИЙ ИТГЭМЖЛЭЛ
19 дүгээр зүйл. Тохирлын үнэлгээний итгэмжлэлийн зорилго, тогтолцоо
19.1. Тохирлын үнэлгээний итгэмжлэлийн зорилго нь худалдаан дахь техникийн саад тотгорыг арилгах, бүтээгдэхүүнд хэрэглэгчийн итгэх итгэлийг нэмэгдүүлэх, тохирлын үнэлгээний дүнг олон улс, бүс нутгийн болон үндэсний хэмжээнд харилцан хүлээн зөвшөөрөх нөхцөлийг бүрдүүлэхэд оршино.
19.2. Тохирлын үнэлгээний итгэмжлэлийн тогтолцоо нь итгэмжлэлийн байгууллага, итгэмжлэгдсэн тохирлын үнэлгээний байгууллага, итгэмжлэлийн техникийн хороо, итгэмжлэлийн шинжээчээс бүрдэнэ.
20 дугаар зүйл. Итгэмжлэлийн байгууллага
20.1. Итгэмжлэлийн байгууллага нь тохирлын үнэлгээний итгэмжлэлийн асуудал эрхэлсэн Засгийн газрын гишүүний дэргэд ажиллана.
20.2. Итгэмжлэлийн байгууллагын даргыг Төрийн албаны тухай хуульд заасны дагуу сонгон шалгаруулж, тохирлын үнэлгээний итгэмжлэлийн асуудал эрхэлсэн Засгийн газрын гишүүн томилж, чөлөөлнө.
20.3. Итгэмжлэлийн байгууллага нь итгэмжлэлийг эрхлэн хэрэгжүүлэх бөгөөд дараах бүрэн эрхтэй:
20.3.1. тохирлын үнэлгээний байгууллагын тодорхой үйл ажиллагаа явуулах чадавхыг тогтоож итгэмжлэх, сунгах, хүчингүй болгох;
20.3.2. итгэмжлэлийн үйл ажиллагаанд хамаарах мэдээллийн санг бүрдүүлэх, ашиглах;
20.3.3. холбогдох дүрэм, журам, заавар батлах, хэрэгжилтэд хяналт тавих;
20.3.4. олон улс, бүс нутгийн байгууллага, гадаад улстай итгэмжлэлийн үр дүнг харилцан хүлээн зөвшөөрөх, хэлэлцээрт нэгдэх, олон улсын байгууллагад гишүүнээр элсэх санал гаргах;
20.3.5. олон улс, бүс нутаг, гадаад улсын итгэмжлэлийн байгууллагатай хамтын ажиллагааг хөгжүүлэх;
20.3.6. эрхэлсэн асуудлаар сургалт, судалгаа явуулах;
20.3.7. тохирлын үнэлгээний итгэмжлэлийн шинжээчид эрх олгох, түдгэлзүүлэх, хүчингүй болгох.
21 дүгээр зүйл. Итгэмжлэлийн техникийн хороо, шинжээч
21.1. Итгэмжлэлийн техникийн хороо нь итгэмжлэлийн шалгуур тогтоох, тохирлын үнэлгээний байгууллагын итгэмжлэлийн шаардлага, шалгуурыг хангасан эсэх талаар дүгнэлт гаргаж, зөвлөгөө өгнө.
21.2. Итгэмжлэлийн техникийн хороо нь орон тооны бус байх бөгөөд сонирхогч талуудын оролцоог тэгш хангасан байна.
21.3. Итгэмжлэлийн шинжээч нь тохирлын үнэлгээний байгууллагын чадавх хууль болон стандарт, техникийн зохицуулалтын шалгуур үзүүлэлтэд нийцэж байгаа эсэхийг үнэлж, дүгнэлт гаргана.
21.4. Итгэмжлэлийн шинжээчид тавигдах шаардлагыг стандартаар тогтооно.
21.5. Итгэмжлэлийн шинжээч нь үнэлгээний дүнг итгэмжлэлийн байгууллагад тайлагнана
ТАВДУГААР БҮЛЭГ
СТАНДАРТЧИЛАЛ, ТОХИРЛЫН ҮНЭЛГЭЭНИЙ ТОГТОЛЦОО, УДИРДЛАГА
22 дугаар зүйл. Стандартчилал, техникийн зохицуулалт, тохирлын үнэлгээ, тохирлын үнэлгээний итгэмжлэлийн талаар Засгийн газрын бүрэн эрх
22.1. Засгийн газар стандартчилал, техникийн зохицуулалт, тохирлын үнэлгээ, тохирлын үнэлгээний итгэмжлэлийн талаар дараах бүрэн эрхийг хэрэгжүүлнэ:
22.1.1. стандартчилал, техникийн зохицуулалт, тохирлын үнэлгээ, тохирлын үнэлгээний итгэмжлэлийн талаарх бодлогыг хэрэгжүүлэхэд дэмжлэг үзүүлэх;
22.1.2. стандартчилал, техникийн зохицуулалт, тохирлын үнэлгээ, тохирлын үнэлгээний итгэмжлэлийн тогтолцооны үр нөлөөг сайжруулах, энэ чиглэлээр хэрэгжүүлэх үйл ажиллагааг боловсронгуй болгох, хууль тогтоомжийн төсөл боловсруулах;
22.1.3. техникийн зохицуулалтыг баталж, мөрдүүлэх;
22.1.4. хүн, малын эрүүл мэнд, хүрээлэн байгаа орчин, нийтийн ашиг сонирхолд хохирол учруулж болзошгүй бүтээгдэхүүний жагсаалтыг батлах, хэрэгжилтийг хангуулах;
22.1.5. итгэмжлэлийн байгууллагын орон тооны дээд хязгаар, дүрмийг батлах.
23 дугаар зүйл. Стандартчилал, техникийн зохицуулалт, тохирлын үнэлгээ, тохирлын үнэлгээний итгэмжлэлийн асуудал эрхэлсэн Засгийн газрын гишүүний бүрэн эрх
23.1. Стандартчилал, техникийн зохицуулалт, тохирлын үнэлгээний итгэмжлэлийн асуудал эрхэлсэн Засгийн газрын гишүүн нь дараах бүрэн эрхийг хэрэгжүүлнэ:
23.1.1. салбарын хөгжлийн бодлого, чиглэлийг тодорхойлж, стратегийн төлөвлөгөөг хэрэгжүүлэхэд дэмжлэг үзүүлэх, нэгдсэн удирдлагаар хангах;
23.1.2. стандартчилал, техникийн зохицуулалт, тохирлын үнэлгээ, тохирлын үнэлгээний итгэмжлэлийн талаарх бодлогын хэрэгжилтийг зохион байгуулах;
23.1.3. стандартчилал, техникийн зохицуулалт, тохирлын үнэлгээ, тохирлын үнэлгээний итгэмжлэлийн тогтолцоог бэхжүүлэх саналыг Засгийн газарт оруулж, шийдвэрлүүлэх;
23.1.4. чанартай бүтээгдэхүүн, үйлчилгээний тэргүүн туршлагыг түгээн дэлгэрүүлэх, олон нийтэд сурталчлан таниулах, алдаршуулах зорилгоор үндэсний чанарын шагнал олгох;
23.1.5. энэ хуульд заасан төлбөртэй ажил, үйлчилгээний төлбөрийн жишиг хэмжээг чөлөөт зах зээлийн үнэ тарифтай уялдуулан тогтоох;
23.1.6. стандартчилал, тохирлын үнэлгээний төв байгууллагын даргыг томилж, чөлөөлөх саналыг Засгийн газарт гаргах.
24 дүгээр зүйл. Стандартчилал, техникийн зохицуулалт, тохирлын үнэлгээ, тохирлын үнэлгээний итгэмжлэлийн талаар төрийн захиргааны төв байгууллагын чиг үүрэг
24.1. Төрийн захиргааны төв байгууллага нь эрхэлсэн асуудлын хүрээнд стандартчилал, техникийн зохицуулалт, тохирлын үнэлгээ, тохирлын үнэлгээний итгэмжлэлийн талаар дараах чиг үүргийг хэрэгжүүлнэ:
24.1.1. салбарын хэмжээнд мөрдөгдөж байгаа стандарт, тохирлын үнэлгээ, техникийн зохицуулалтын хэрэгжилтэд дүн шинжилгээ хийх, хяналт шалгалт явуулах;
24.1.2. стандартыг шинэчлэн сайжруулах, хэрэгжүүлэх ажлыг стандартчилал, тохирлын үнэлгээний төв байгууллагатай хамтран зохион байгуулах;
24.1.3. эрхэлсэн асуудлаар энэ хуульд заасан Техникийн хороонд гишүүнийг ажиллуулах;
24.1.4. салбарын хэмжээнд дагаж мөрдөх стандартчилал, тохирлын үнэлгээний талаар нийтэд мэдээлэх, сурталчлах, соён гэгээрүүлэх үйл ажиллагааг зохион байгуулах.
24.2. Гадаад худалдааны асуудал эрхэлсэн төрийн захиргааны төв байгууллага энэ хуулийн 13.4, 14.2-т заасан баримт бичгийг Монгол Улсын нэрийн өмнөөс Дэлхийн худалдааны байгууллагад мэдэгдэнэ.
25 дугаар зүйл. Стандартчилал, тохирлын үнэлгээний байгууллагын тогтолцоо
25.1. Стандартчилал, тохирлын үнэлгээний төв байгууллага нь стандартчилал, техникийн зохицуулалт, тохирлын үнэлгээний чиглэлээр мэргэжил арга зүйн удирдлагаар хангах чиг үүрэг бүхий төрийн захиргааны байгууллага мөн.
25.2. Стандартчилал, тохирлын үнэлгээний байгууллагын тогтолцоо нь стандартчилал, тохирлын үнэлгээний төв байгууллага, түүний харьяа аймаг, нийслэл дэх байгууллагаас бүрдэнэ.
25.3. Аймаг, нийслэл дэх стандартчилал, тохирлын үнэлгээний төрийн захиргааны байгууллага нь нутаг дэвсгэрийн хэмжээнд стандартчилал, техникийн зохицуулалт, тохирлын үнэлгээний бодлогын хэрэгжилтийг
25.4. Аймаг, нийслэлийн Засаг дарга харьяа нутаг дэвсгэртээ энэ хуулийн биелэлтийг хангаж, стандартчилал, тохирлын үнэлгээний байгууллагын үйл ажиллагаанд дэмжлэг үзүүлнэ.
25.5. Салбарын хяналтыг хэрэгжүүлэх эрх бүхий байгууллага, хяналтын улсын байцаагч, албан тушаалтан нь хариуцсан чиглэлээр стандартчилал, тохирлын үнэлгээний хэрэгжилтийг хангуулж ажиллана.
26 дугаар зүйл. Стандартчилал, тохирлын үнэлгээний төв байгууллага
26.1. Стандартчилал, тохирлын үнэлгээний төв байгууллага дараах чиг үүргийг хэрэгжүүлнэ:
26.1.1. эрхэлсэн асуудлын хүрээнд бодлого боловсруулах, хэрэгжүүлэх, мэргэжил, арга зүйн удирдлагаар хангах чиг үүргийг хэрэгжүүлэх;
26.1.2. стандартчилал, техникийн зохицуулалт, тохирлын үнэлгээний үйл ажиллагаанд баримтлах баримт бичиг, хөтөлбөр, төлөвлөгөө, хэм хэмжээ тогтоосон акт боловсруулах, батлах, хэрэгжүүлэх;
26.1.3. стандартчиллын техникийн хороо, дэд хороодыг байгуулах, өөрчлөх, татан буулгах, үйл ажиллагааг зохицуулах, дэмжлэг үзүүлэх;
26.1.4. техникийн хорооны дүгнэлтийг үндэслэн стандартыг батлах, хүчингүй болгох, бүртгэх, түүний албан ёсны эхийг хадгалах, олон нийтэд мэдээлэх, түгээх;
26.1.5. тохирлын үнэлгээг энэ хуульд заасны дагуу явуулах;
26.1.6. хариуцсан асуудлаар олон улсын байгууллагад гишүүнээр элсэх санал гаргах, олон улс, бүс нутаг, гадаад улсын холбогдох байгууллагатай хамтын ажиллагааг хөгжүүлэх, тохирлын үнэлгээний үр дүнг харилцан хүлээн зөвшөөрөх;
26.1.7. үнэт металл, эрдэнийн чулуу, түүгээр хийсэн эдлэлийг тодорхойлох, хяналт тавих;
26.1.8. хариуцсан асуудлаар төлбөртэй ажил, үйлчилгээ эрхлэх, сургалт явуулах;
26.1.9. энэ хуульд заасан мэдээллийн санг бүрдүүлэх, ашиглах, удирдах, хяналт тавих;
26.1.10. энэ хуулийн 26.1.8-д заасан ажил, үйлчилгээг аж ахуйн нэгж, байгууллага, төрийн бус байгууллагаар гэрээний үндсэн дээр гүйцэтгүүлэх;
26.1.11. стандартчилал, техникийн зохицуулалт, тохирлын үнэлгээний онолын суурь судалгаа хийх, эрдэм шинжилгээний ажлын үр дүнг үйлдвэрлэл, үйлчилгээнд нэвтрүүлэх;
26.1.12. чанартай бүтээгдэхүүн үйлдвэрлэгчийг алдаршуулан үндэсний чанарын шагнал олгох үйл ажиллагааг зохион байгуулах.
27 дугаар зүйл. Аймаг, нийслэл дэх стандартчилал, тохирлын үнэлгээний төрийн захиргааны байгууллага
27.1. Аймаг, нийслэл дэх стандартчилал, тохирлын үнэлгээний төрийн захиргааны байгууллага нутаг дэвсгэрийн хэмжээнд дараах чиг үүргийг хэрэгжүүлнэ:
27.1.1. энэ хуулийн хэрэгжилтийг хангуулах ажлыг зохион байгуулах;
27.1.2. тохирлын үнэлгээг энэ хуульд заасны дагуу явуулах;
27.1.3. стандартчилал, тохирлын үнэлгээний төв байгууллагын зөвшөөрснөөр гадаад улс, бүс нутгийн хэмжээнд хамтран ажиллах;
27.1.4. үнэт металл, эрдэнийн чулуу, түүгээр хийсэн эдлэлийг тодорхойлох, хяналт тавих;
27.1.5. хариуцсан асуудлаар төлбөртэй ажил, үйлчилгээ эрхлэх, сургалт явуулах, олон нийтийн мэдлэгийг дээшлүүлэх, сурталчлах;
27.1.6. энэ хуульд заасан мэдээллийн санг бүрдүүлэх, хөгжүүлэх;
27.1.7. иргэн, хуулийн этгээд, төрийн бус байгууллагад стандарт боловсруулах талаар арга зүйн зөвлөгөө өгөх, байгууллагын стандартыг бүртгэх;
27.1.8. стандартчилал, техникийн зохицуулалт, тохирлын үнэлгээний чиглэлээр төрийн хяналт шалгалтын байгууллага, эрх бүхий албан тушаалтантай хамтран ажиллах.
28 дугаар зүйл. Стандартчилал, техникийн зохицуулалт, тохирлын үнэлгээний салбар дундын зохицуулалт
28.1. Хүн, малын эрүүл мэнд, хүрээлэн байгаа орчин, бүтээгдэхүүн, үйлдвэрлэлийн аюулгүй байдлыг хангах зорилгоор төрийн захиргааны төв болон төрийн захиргааны байгууллага, хяналт шалгалт хэрэгжүүлэх эрх бүхий байгууллага, аймаг, нийслэлийн засаг дарга нь хариуцсан чиглэлээр стандарт, техникийн зохицуулалтын хэрэгжилтийг хангуулна.
28.2. Стандартчилал, тохирлын үнэлгээний төв байгууллага нь салбар дундын уялдааг хангах зорилгоор төрийн захиргааны төв байгууллагатай хамтран дараах үйл ажиллагаа явуулна:
28.2.1. стандарт, тохирлын үнэлгээ, техникийн зохицуулалтын хэрэгжилтэд дүн шинжилгээ хийх;
28.2.2. стандарт, техникийн зохицуулалтын хэрэгжилтийг эрчимжүүлэх ажлыг зохион байгуулах, холбогдох байгууллагад дүгнэлт, зөвлөмж хүргүүлэх;
28.2.3. стандартыг шинэчлэн сайжруулах зорилгоор таван жил хүртэлх хугацаанд шинжлэх ухаан, техникийн түвшинд үзлэг хийх;
28.2.4. стандарт, техникийн зохицуулалтын хэрэгжилтийн талаарх судалгаа, тайлан мэдээг Төрийн хяналт шалгалтын тухай хуульд заасан эрх бүхий байгууллагаас жил бүр гаргуулах;
28.2.5. энэ хуульд заасан мэдээллийн санг бүрдүүлэх, ашиглах.
28.3. энэ хуульд заасан тохирлын үнэлгээнд заавал хамруулах бүтээгдэхүүнийг улсын хилээр нэвтрүүлэхдээ тохирлын баталгаатай эсэхэд гаалийн байгууллага хяналт, шалгалт хийнэ.
28.4. Эрх бүхий этгээд тохирлын гэрчилгээг үндэслэн тодорхой төрлийн зөвшөөрөл олгох, сунгах үйл ажиллагааг хялбаршуулсан журмаар явуулж бол
28.5. Үндэсний стандарт, олон улсын болон бүс нутгийн стандарт боловсруулах зардлыг төсвийн байгууллага өөрийн төсөвт тусгаж санхүүжүүлнэ.
29 дүгээр зүйл. Төрийн хяналт
29.1. Бүтээгдэхүүнийг зах зээлд нийлүүлснээс хойших үе шатанд стандарт, техникийн зохицуулалтын хэрэгжилтийн хяналтыг эрх бүхий улсын байцаагч хэрэгжүүлнэ.
29.2. Улсын байцаагч нь хүн, малын эрүүл мэнд, хүрээлэн байгаа орчин, нийтийн ашиг сонирхолд хохирол учруулж болзошгүй бүтээгдэхүүн болон бусад хуулиар хэрэгжүүлэхээр заасан бүтээгдэхүүний тохирлын баталгаатай эсэхэд хяналт тавина.
29.3. Эрх бүхий хяналтын улсын байцаагч нь хяналт, шалгалтын үйл ажиллагаанд баталгаажуулалтын байгууллагын үр дүнг ашиглаж болно.
29.4. Энэ хуулийн 29.1-д заасан хяналтыг хэрэгжүүлэх улсын байцаагч нь стандартчилал, техникийн зохицуулалт, тохирлын үнэлгээний чиглэлээр сургалтад хамрагдаж, гэрчилгээ авсан байна.
29.5. Энэ хуулийн 28.3-т заасан бүтээгдэхүүнийг улсын хилээр нэвтрүүлэхэд дараах үйл ажиллагааг хэрэгжүүлнэ:
29.5.1. хууль тогтоомж, стандартчиллын баримт бичигт заасан шаардлага хангасан бараа бүтээгдэхүүнийг улсын хилээр нэвтрүүлэх;
29.5.2. экспортлогч орны хүчин төгөлдөр тохирлын гэрчилгээ, нийлүүлэгчийн мэдэгдэл, түүнтэй адилтгах гэрчилгээтэй бүтээгдэхүүнийг улсын хилээр нэвтрүүлэх;
29.5.3. тохирлын үнэлгээнд заавал хамруулах бүтээгдэхүүнээс бусад бүтээгдэхүүнийг холбогдох хууль тогтоомжийн дагуу зах зээлд нийлүүлэх, улсын хилээр нэвтрүүлэх;
29.5.4. Хуульд өөрөөр заагаагүй бол энэ зүйлийн 14.2-т заасны дагуу хүлээн зөвшөөрөгдсөн, хүчин төгөлдөр тэмдэг, гэрчилгээтэй бүтээгдэхүүнийг зах зээлд нийлүүлэх, Улсын хилээр нэвтрүүлэхэд тохирлын үнэлгээнд давтан хамруулахгүй байх;
29.5.5. тохирлын баталгаатайгаар улсын хилээр нэвтрүүлсэн бараа, бүтээгдэхүүний статистик мэдээллийг стандартчилал, тохирлын үнэлгээний төв байгууллагад хагас жил тутам ирүүлэх.
29.6. Сорьцын хяналтын улсын байцаагч нь Төрийн хяналт шалгалтын тухай хуулийн 10.9-д зааснаас гадна дараах эрх, үүргийг хэрэгжүүлнэ:
29.6.1. үнэт металл, түүгээр хийсэн эдлэлийн сорьц тогтоох, эрдэнийн чулууг тодорхойлохтой холбоотой хууль тогтоомж, стандартын хэрэгжилтийг хангуулах, хяналт тавих;
29.6.2. үнэт металл, түүгээр хийсэн эдлэлд сорьц тогтоосон болон эрдэнийн чулууг тодорхойлсон эсэхэд хяналт тавих;
29.6.3. шаардлагатай тохиолдолд лабораторийн буюу магадлан шинжилгээг мэргэжлийн байгууллагаар гүйцэтгүүлэх;
29.6.4. үнэт металл, эрдэнийн чулуу, түүгээр хийсэн эдлэлийг тодорхойлсон талаар дүгнэлт гаргах;
29.6.5. үнэт металлын сорьцын баталгааны тэмдэг болон үйлдвэрлэгчийн барааны тэмдэглэгээнд хяналт тавих;
29.6.6. эрх бүхий хуулийн этгээдийн сорьц тогтоох үйл ажиллагаанд хяналт тавих.
30 дугаар зүйл. Иргэн, хуулийн этгээдийн эрх үүрэг
30.1. Иргэн, хуулийн этгээд нь стандартчилал, техникийн зохицуулалт, тохирлын үнэлгээний талаар дараах эрхтэй:
30.1.1. бүтээгдэхүүн, үйлчилгээний чанарыг дээшлүүлэх чиглэлээр стандарт, менежментийн тогтолцоог нэвтрүүлэх, тохирлын үнэлгээнд хамрагдах;
30.1.2. стандарт санаачлах, боловсруулах;
30.1.3. стандарт, стандартчиллын хөтөлбөрийн төсөлд санал өгөх.
30.2. Иргэн, хуулийн этгээд нь стандартчилал, техникийн зохицуулалт, тохирлын үнэлгээний талаар дараах үүрэгтэй:
30.2.1. стандарт, техникийн зохицуулалтаар тогтоосон шаардлагын дагуу бүтээгдэхүүний чанар, аюулгүй байдлыг хангах;
30.2.2. стандартыг боловсруулах, бүтээгдэхүүнийг тохирлын үнэлгээнд хамруулах, түүнтэй холбогдон гарах зардлыг санхүүжүүлэх;
30.2.3. стандарт, техникийн зохицуулалт, тохирлын үнэлгээний чиглэлээр ажилтныг чадавхжуулах;
30.2.4. хүн, малын эрүүл мэнд, хүрээлэн байгаа орчин, нийтийн ашиг сонирхолд хохирол учруулж болзошгүй бүтээгдэхүүнийг тохирлын баталгаатайгаар Монгол Улсын зах зээлд нийлүүлэх;
30.2.5. тохирлын болон түүнтэй адилтгах тэмдэг, гэрчилгээтэй бүтээгдэхүүнийг улсын хилээр нэвтрүүлэх;
30.2.6. хуульд заасан бусад.
30.3. Иргэн, хуулийн этгээд, сонирхогч талуудын боловсруулсан стандартын төсөл нь хууль тогтоомж, техникийн зохицуулалт болон үйлдвэрлэгч, хэрэглэгчийн эрх ашигт харшлаагүй, нийтийн ашиг сонирхол, хүн, малын эрүүл мэнд, хүрээлэн байгаа орчин, улс орны аюулгүй байдалд хохирол учруулахааргүй байна.
ЗУРГАДУГААР БҮЛЭГ
МЭДЭЭЛЛИЙН САН
31 дүгээр зүйл. Мэдээллийн сан
31.1. Стандартчилал, тохирлын үнэлгээ, тохирлын үнэлгээний итгэмжлэлийн мэдээллийн нэгдсэн сан (цаашид “Мэдээллийн сан” гэх) –тай байна.
31.2. Мэдээллийн сан дараах төрөлжсөн сангаас бүрдэнэ:
31.2.1. стандартчиллын баримт бичгийн мэдээллийн сан;
31.2.2. итгэмжлэгдсэн тохирлын үнэлгээний байгууллагын мэдээллийн сан;
31.2.3. баталгаажуулалтын үр дүнгийн мэдээллийн сан;
31.2.4. лабораторийн шинжилгээний үр дүнгийн мэдээллийн сан;
31.2.5. техникийн хяналтын үр дүнгийн мэдээллийн сан;
31.2.6. сорьц тогтоолгон баталгаажсан үнэт металлаар хийсэн бүтээгдэхүүний болон гэрчилгээтэй эрдэнийн чулууны мэдээллийн сан;
31.2.7. баталгаажуулалтын шинжээчийн мэдээллийн сан;
31.2.8. стандарт, техникийн зохицуулалтын хэрэгжилтийн хяналтын мэдээллийн сан;
31.2.9. энэ хуулийн хүрээнд хамаарах бусад.
31.3. Мэдээллийн сан нь нэгдсэн удирдлага зохицуулалт бүхий программ хангамжтай байна.
31.4. Стандартчилал, тохирлын үнэлгээний төв байгууллага мэдээллийн санг удирдах, хөгжүүлэх, нууцлал, хадгалалт, хамгаалалтын найдвартай байдлыг хангана.
32 дугаар зүйл. Мэдээллийн сан бүрдүүлэх, хөгжүүлэх
32.1. Энэ хуулийн 31.2-т заасан төрөлжсөн мэдээллийн санг дараах байгууллагууд бүрдүүлнэ:
32.1.1. стандартчилал, тохирлын үнэлгээний төрийн захиргааны байгууллага;
32.1.2. итгэмжлэлийн байгууллага;
32.1.3. төрийн хяналт шалгалт хийх эрх бүхий байгууллага:
32.1.4. гаалийн байгууллага;
32.1.5. тохирлын үнэлгээний байгууллага;
32.1.6. бусад.
32.2. Энэ хуулийн 32.1-д заасан байгууллагууд мэдээллийн сангийн мэдээллийг тухай бүр оруулна.
32.3. Мэдээллийн сан нь эрх бүхий байгууллагууд мэдээлэл оруулах, солилцох, хянах нөхцөлийг бүрдүүлж ашиглах боломжтой байна.
32.4. Мэдээллийн санд мэдээлэл бүртгэх, баяжуулах, баталгаажуулах чиг үүргийг энэ хуулийн 32.1-д заасан байгууллага мэдээллийн үнэн зөв байдлыг хариуцна.
33 дугаар зүйл. Мэдээллийн санг ашиглах, хадгалах, хамгаалах
33.1. Мэдээллийн сангийн өгөгдөл нь нээлттэй, хаалттай гэсэн төрөлтэй байх бөгөөд мэдээллийн санд бүртгэгдсэн мэдээллээс төрийн болон албаны, хувь хүн, хуулийн этгээдийн нууцад хамаарах болон олон улсын гэрээ хэлэлцээрт нууцлахаар зааснаас бусад мэдээлэл нь нийтэд нээлттэй байна.
33.2. Мэдээллийн сан бүрдүүлэх, аюулгүй байдлыг хангах хүрээнд стандартчилал, тохирлын үнэлгээний төв байгууллага шаардлагатай программ хангамж, техник хэрэгслээр хангагдсан байна.
33.3. Мэдээллийн сан үрэгдэх, устгагдахаас бүрэн хамгаалагдсан байх бөгөөд мэдээллийн санг нөөцлөн цахим технологийн дагуу Архивын тухай хууль тогтоомжид заасан хугацаанд хадгална.
33.4. Мэдээллийн сангийн мэдээлэл бодит бус байгаа нь баримтаар тогтоогдвол энэ хуулийн 32.1-д заасан байгууллага залруулгыг хийнэ.
33.5. Мэдээллийн сан хариуцсан эрх бүхий байгууллага, албан тушаалтан мэдээллийн санг бусад этгээдэд шилжүүлэх, хуулиар хүлээсэн чиг үүрэгтээ хамааралгүй зорилгоор ашиглахыг хориглоно.
ДОЛООДУГААР БҮЛЭГ
САНХҮҮЖИЛТ
34 дүгээр зүйл. Санхүүжилт
34.1. Стандартчилал, тохирлын үнэлгээний төв байгууллага, түүний харьяа аймаг, нийслэлийн байгууллага болон итгэмжлэлийн байгууллагыг улсын төсвөөс санхүүжүүлнэ.
34.2. Энэ хуульд заасан стандартчилал, техникийн зохицуулалт, тохирлын үнэлгээний талаар онолын суурь судалгаа хийх, эрдэм шинжилгээний ажлын үр дүнг үйлдвэрлэл, үйлчилгээнд нэвтрүүлэх зардлыг Засгийн газрын тусгай сангийн тухай хуульд заасны дагуу Үндэсний шинжлэх ухаан, технологийн сангаас санхүүжүүлнэ.
34.3. Стандартчилал, техникийн зохицуулалт, тохирлын үнэлгээний итгэмжлэлийн асуудал эрхэлсэн Засгийн газрын гишүүн нь Төсвийн тухай хуулийн 46 дугаар зүйлд заасны дагуу үндсэн үйл ажиллагааны нэмэлт орлогоос стандартчилал, техникийн зохицуулалтын техникийн шинэчлэл, хүний нөөцийн чадавхыг бэхжүүлэх зардлыг санхүүжүүлж болно.
34.4. Стандартчилал, тохирлын үнэлгээ, тохирлын үнэлгээний итгэмжлэлийн санхүүжилт нь энэ зүйлийн 34.1, 34.2-т зааснаас гадна дараах эх үүсвэрээс бүрдэнэ
34.4.1. төлбөртэй ажил, үйлчилгээний хураамж;
34.4.2. олон улсын байгууллага, хандивлагч орны хандив, тусламж;
34.5. Энэ хуульд заасан төлбөртэй ажил, үйлчилгээний төлбөрийн жишиг хэмжээг чөлөөт зах зээлийн үнэ тарифтай уялдуулан стандартчилал, тохирлын үнэлгээний асуудал эрхэлсэн Засгийн газрын гишүүн тогтооно.
НАЙМДУГААР БҮЛЭГ
ХАРИУЦЛАГА
35 дугаар зүйл. Стандартчилал, техникийн зохицуулалт, тохирлын үнэлгээний итгэмжлэлийн хууль тогтоомжийг зөрчигчид хүлээлгэх хариуцлага
35.1. Энэ хуулийг зөрчсөн албан тушаалтны үйлдэл, эс үйлдэхүй нь зөрчил, гэмт хэргийн шинжгүй бол Төрийн албаны тухай хууль, Төрийн албан хаагчийн ёс зүйн тухай хуульд заасан хариуцлага хүлээлгэнэ.
35.2. Энэ хуулийг зөрчсөн хүн, хуулийн этгээдэд Эрүүгийн хууль, эсхүл Зөрчлийн тухай хуульд заасан хариуцлага хүлээлгэнэ.
36 дугаар зүйл. Хууль хүчин төгөлдөр болох
36.1. Энэ хуулийг 2025 оны ... дугаар сарын ....-ний өдрөөс эхлэн дагаж мөрдөнө.
Гарын үсэг


ТӨСЛИЙН ФАЙЛУУД

(1.Хуулийн төсөл 2025_1.05.05.docx)